فيديو مدونة ام عبدالله

انتهينا من تصميم

تم افتتاح الموقع الرسمي لمصممة فساتين الافراح بشرى العيدان
www.bushraalaidan.com

اقسم بالله العظيم ان اكون طفلا مطيعا

اليوم اليوم الموعود بنتي بليل تقولي بابا باجر مو تنسى حفلة تخرجي قلتلها حاضر ايي ليش ما ايي

المنبه العاده يرن الساعه 6 هالمره المنبه ما رن وعيت على مطامر على السرير وماشاء الله عيالنا

خفاف وزن ما ياكلون مجابيس وبالغلط بقول مسيكينه بس هالمره اقول انا المسكين ريلها بنص بطني

بطلت عيوني ابي هوااااااا شقاعد تسوين تقول يله بابا بنروح الحفله قلتلها الساعه جم تقولي 7

طبعا الساعه 5 الفير بتخرج ومو معلمينها الوقت قلنا مو مشكله خل نصحصح ونسويلنا ريوق لين ايي وقت

الحفله وحده من هواياتي الزيتون الاخضر لازم يكون الصبح على الريوق اتمطق بالطعام واكثر منه

والحنه اشتغلت تدرون بناتنا ما يتعلمون الحنه تيقنت في هذا اليوم انه القصه وراثيه جينيه كل مره تحن

هالبنوته الصغيرونه كلت قلبي متى نروح ومتى نروح لين قصيت بطعام الزيتون تثنت الشهقه

قلت الثالث بعد اييني عزرائيل ما يرد النفس خل اقوم اوديها .............داخل الحفل

فقرات متنوعه وتعرف اليهال بالروضه حفلاتهم كلها اغاني ورقص جيل الرقاصين خل نكون واقعيين

بس حاولوا تركزون على تربيتهم داخل البيت لا يطلعلكم بلاء ترف ولا جنس ولا يصيرون بناتنا

هيفا ونانسي خلصت الحفله الحمدلله وما استمتعت الا يوم انتهت الحفله انشاء الله تشوفون عيالكم مهندسين

وطيارين ودكاتره واطبه ومن كل تخصص جامعي زين قولوا آمين هذي المقاله كتبتها لغاية في نفس

يعقوب وهو هذا الاستثمار الحقيقي عيالنا الجيل اليديد قبل كانوا يقولون لنا انتوا الجيل اليديد وكل ما ايي

جيل قالوله انت الجيل اليديد الجيل اليديد تربيتنا ربوا عيالكم عدل وخروهم عن المصخره الي ما منها

فايده الله يحفظكم كلكم ختامها اليهال يقولون قسم الداخليه اقسم بالله العظيم ان اكون طفلا مطيعا

مجموعة مدونات من تصميمي لزبايني

3 مدونات صممتهم لتجار مهتمين بالتجارة الالكترونية والتسويق الالكتروني

الاولى ملك الالوان للعبايات

الثانية دار زينب خياط سيدات

الثالثة فجر الكويت

اضغط على كل اسم وتنتقل للمدونه شوف تصميمها وارائكم مهمه بالنسبه لي

تصميم اليريور

ياكم التصميم الثاني اعلان بنزله بالمنتديات رايكم يا حلوين لا توقفون

ترقبوا الاعلان الي بينزل بالمجله الاعلانيه ولا تنسون تعليقاتكم ضروريه الصقر اسمه حمني ترى اليف بعد التصوير البطه ساحلها شرالها موكا فربتشينو من ستار بكس لا تخافون ما تعورت بس حركات على الخفيف

فيديو المحاضرة الثالثه دورة تصميم تسويق استثمار

اخذ عربون قبل لا يصير شي بالريال الدنيا مو بيدك

طبيعة عمل التصميم خدمة تتحول الى سلعه ياخذ المصمم وقت لين يوصل للشكل النهائي بارضاء الزبون بالشكل الي يقدمه له الاخ الكريم صاحب سفريات يكلمني عبر المسنجر يقولي ابي تصمملي شعارات شلون الطريقه طبعا الاسلوب طيب ويقول ما اتصل عليك اخاف بعدين ما يعجبني الشغل ويتسببلك احراج المهم قلتله بسويلك 3 نماين تختار نمونه فما اعتقد راح يكون فيها احراج ومن باب الثقه اقوله اعرف شغلي واعرف انه راح يرضيك يعني شغلك بسيط طلبت مني شكل وتبي تقلده انا اسويلك الي تبي تقلده واسويلك لوقو من عندي خاص وتقارن المهم بعد ما انتهى الشغل وتم الاتصال ويقولي الريال شغلك ماشاء الله حلو انشاء الله الحين اطلع البنك وموعدي الساعه 9 معاك في المكان الفلاني الحمدلله قلت تمت الرزقه والشغل ما صار بلاش رن جرس الساعه ورن تلفون الريال اتصل عليه ما يرد وصارله 4 شهور ما يتصل انقول انشاء الله ما فيه الا العافيه الفلوس فدى بني آدم في هالحال ظنوا بالخير ممكن حصل للرجل شي منعه انه يمر 4 شهور او يتصل واتمنى من اي مصمم المره اليايه يا خذ عربون عشان في حال صار مانع ما يروح شغله بلاش ادعوا اذا مريض الله يشافيه واذا عنده حالة وفاة الله يرحم المسلمين واذا حادث سياره انشاء الله تتصلح سيارته ولا يشتري اف جي او همر ويخلص اموره بسرعه ويعطينا حسابنا

بدأ العد التنازلي

بدأ العد التنازلي هذه الدوره انشاء الله راح تكون الاولى من نوعها في الكويت واطلب منكم دعائكم

ولكم جزيل الشكر

سؤال الزباين

تصميم اعلان ستاير ومفروشات

تصميم بوستر اعلاني لمجلة اعلانيه هذا الاعلان خاص بشركة ترو آرت للاثاث والمفروشات شرح الاعلان الشركة متخصصه بالاثاث بدايه كان تفكيري شلون اصمم اعلان مختص بالاثاث بدون لا يكون رسمي بمعنى كتابات تفصيل ستاير او تفصيل اثاث استخدمت الايحاء الغير مباشر في الاعلان بمعنى الشايب يسولف عن دوانيته والمره تسولف عن اثاث بيتها
ومنتظر ردت الفعل الاعلان بينزل بمجلة الصفاة الاعلانية يوم الاحد القادم انشاء الله

التجارة الألكترونية فيديو مجمع الكويت الالكتروني

فضيحة يا ساتر

قلنا فضيحه وصج فضيحه يتكلمون عن الثقافه وعن الانتاج ربعنا وهمه بالنت ما يدورون غير هالكلام عنوان فيه فضيحه على طول يدخله كلمات راح ابطها تدريجيا توصل عدد زوارك للمليون مشاهد المهم يا حلوين هذي فضيحة الثقافة الالكترونية الاشهار بالفضايح والناتج مبروك صرت اعلامي ناجح من ظهر الفضايح دعمكم لي زيارتكم للموقع وهذا البوستر من تصميمي يبين واقع التجارة الالكترونية وقائع مالها اول ولا تالي كل يوم بسولفلكم بفضيحه شرايكم ....

الدرس الثاني لدورة تصميم تسويق استثمار

اسقاط القروض بعد اجماع النواب

لاول مره انقل كلام يعجبني لحس الفن لدى هذا الرجل

ضربكى المقترض نصف ساعة أمام مكتب أحد النواب، فكسر خاطر سكرتيره، فخرج وطلب منه ان يكتب عريضة للنواب يشكو حاله، فقال المقترض: لو سمحت أعطني (رولا) طويلا من الورق..
أمسك القلم وكتب التالي: أنا عربي من بني(عدنان) عشت بفيللا كبيرة في (سلوى) ،ألعب بالفلوس لعب، لما خسرت ذهب (السلطان) وعشت الفقر، فاقترضت من بنك كنت أظنه (عادل)،
قرأت الشروط ووجدت أمرها (هايف) وبإمكاني تعويض كل ما خسرته، واستغربت كيف انا الإنسان (الراشد) أصبت بـ(الحويلة) فلم أقرأ ما بين السطور ووقعت بالفخ.. و(العدوة) التي أصابت البعض وصلتني وأصبحت من المطلوبين والملاحقين،
ولما اشتكيت عند مستشار مصري وشّه (سعد) قال ان الجهة التي اقترضت منها ليست (معصومة) من الخطأ ولكن القانون لا يحمي المغفلين،
أصبت بـ(الزلزلة) التي هزت كياني وعرفت أنني مو( ناجي) وانني ما كنت (مرزوق) و(غانم) أصبحت مطاردا من (عسكر) الدولة ،ولقب الحوت الذي كانوا يطلقونه علي صار (نملان)، بعد ان كنت أظن ان عمري كعمر (شعيب) أصبحت أعد أيامي خوفا من (بو رمية) و لأني (مسلم) سلمت أمري لله
و كتبت تظلما فقالوا: كلامك (خرافي ) إذهب إلى شيخ دين اسمه (علي) ليقرأ عليك ، ادخلني عليه مساعده (حسين) ليفك النحس ، و بعد أن قرأ علي قال: إنت رجل (صالح) لكنك محسود ،
هات منقار الديك (الرومي) ، و سأكشف لك العمل بعد الكورس (الصيفي) بالجامعة ، و لأن الموعد بعيد ذهبت إلى ( الملا) ليقرأ علي فقال: إذبح (وعلان) و وزعهما على الفقراء ، و بعد (جمعان) راجعني .
و لأن الوقت قاتل و لا يمكنني الانتظار ذهبت إلى دجال فقال: هات تيس (وليد) و صورة (بنيه) و خاتم من (الصواغ) و مسامير من (القلاف) و 3 حبات (خنفور) و 10 غرامات (زنيفر) ، إن قرأت و صرت (صرعاوي) راح تتكلم الجن ، أما أن صمدت فإنت (سعدون) .
خفت من الاعيبه ، ف(المسلم) يعرف ربه و هو (حسن) الجوهر . ذهبت إلى ( المطوع) فقال لي: (السعدون) اللي يتعظ بأخطاء غيره ، لا تفرد ريشك ك(الطاحوس) أقصد الطاووس ، فيدوسونك فتصبح (دويسان).
(العمير) يركض و لا (مخلد) إلا الله ، و العمل الصالح (فيصل) بين الحق و الباطل ، إذهب لنائب (زاهد) و قل له إنك خير (خلف) لخير سلف ، و لا تنحشونا من ديرتنا و تصبح (الهاجري) في بلاد الله ،
وإذا سمعك إستخر ربك و أطلب (مزيد) من المال ، و إن دارت الأمور عليك قل: سوف (أسيل) ما تبقى من ممتلكاتي لأعيش ، و سيجزيك الله في (روضان) الجنة . و السلام عليكم و رحمة الله و بركاته

فيديو تسويقي للمدونات انشاء الله يعجبكم صوتي بس يا شباب ويا بنات ما راح اغني ولا راح اشارك في ستار اكادمي

http://www.youtube.com/watch?v=rL0D1AYyKt4

نظرية ونسني وبطل مخباتي

نظرية fun theory نظره لها معنى بكسب الزبون بمعنى اذا قدرت تحرك مشاعر الفرح بالزبون كسبته لسبب الفرح نفرض على سبيل المثال عندنا القهاوي الشعبيه القعده فيها ما تنبغى كراسيها مكسره الشيشه خشب مغشوش قلاص الشاي ما يغسلونه من زبون لي زبون بس رشة ماي على السريع والي يقدملك الطلبات مو متسبح اسبوع ريحته تبط الراس ولا تشوف النفسيه اذا صار ابو الكلام البنغالي وبياخذ منك الطلب ها شنو يبي تقول طار منه انزين بعد هالمقدمه الخايسه شلي حاد العالم يقعدون فيها تلقى فيها عبود يجذب وايد حمود رفيجه يحب يروح اهناك يسمعله جم صاروخ وفهيد نكته واحد فصله كل يوم يايلك بسالفه يديده ولا اييك بو سالم الشايب حبابة القهوه يقعد يسولف يقولك قصص القبوط واليريش والمرقوق كل هذي الشغلات تشبع حاجات عند نفس بني ادم اتمنى يكون المثال واضح واخليكم مع الكركتر هذا الكركتر مو انا راسمه كل الي سويته اني شلت الكلام الي عليه وحطيت قصه من عندي وهذا الحوار كسبني زباين وايد لانهم استانسوا اتمنى انه يعجبكم وتصيرون زبايني

طياره طارت بالسما العالي

تصميم بوستر للسياحه والسفر متدربتي طلبت مني تصميم بوستر يختص في مجال السياحه والسفر حولت الموضوع الى درس تدريبي ودرسي في هذا اليوم كان عن دمج الصور وصناعة اعلان باستخدام دمج الصور
والتدريب على عبارات الدعايه الكتابيه
مثل ما تشوفون الصوره عباره عن 3 صور مدموجه مع بعض والعباره المستخدمه كتابه بالنص
الصور ايحائات للسفر الطيارات والترفيه
والعبارة المستخدمه طياره طارت في السما العالي هذي العباره استهدفت فيها ناس معينين الناس اللي في هذا الزمن تقدر تسافر جيل مواليد الـ الستينات السبعينات والثمانينات هذا الجيل عاصر هذي العباره وقت الطفوله كانوا يغنون طياره طارت في السما العالي فيها السالم الغالي
السالم الغالي محفور بقلوب الناس طياره طارت عباره مختصره تذكر الناس في السفر الاعلان فكر واحساس اجمع مهاراتك واستخدمها في تصميم اعلانك مو شرط انه يكون تصميم ورسم صوره مثل ليوناردو ولا تنحت نحت مايكل انجيلو المطلوب منك تحس بالناس وتخليهم يحبون اعلانك

تصميم شعار لمقهى ومطعم 7 بار الي خلف المارينا

اتصل علي صديق وقالي في مطعم فاتح وفي ناس يبون يتعرفون عليك وتعرض خدماتك التسويقيه لهم الموعد الساعه 7 المغرب توجهت خلف المرينا وكل يوم قهوه شكل فاتحه يعني تنافس مو طبيعي دخلت المقهى ماشاء الله تبارك الرحمن شغل متعوب عليه قابلت مديرة المطعم وبعدها بنفس الوقت مدير المطعم ازواج الله يبارك لهم ونرجع للموضوع تكلمت معاهم عن التسويق ومهمته وفايدته للمطعم وقدمت لهم عرض السعر للتصميم كان هذا الشعار بداية يعني شوفوا شغلي زين شعاري احلى من شعاركم وبين المعرفه والتعارف وتذوقنا اكل المطعم والمقهى اكلهم خوش واسعارهم خوش بالنهايه ما صار نصيب بالشغل افا وهاردلك لسبب تاجيل حملتهم الاعلانيه هذي وحده من المشاكل الي تواجه المصمم وتسويق الاعلانات لا تبني خيالات تامل الخير وشد حيلك التصميم الاول لا تخليه في بالك انه هذا الي راح يوافق عليه الزبون رتب امورك جهز تصميم قدم عرض سعر مناسب بس لا تبخس حقك بالشغل وحطلك وقت اتفاق مع زبون قبلها مجهز شغلك كله مثلا خلال الفتره الفلانيه ما وافق على عرض السعر لا توقف شغلك ابدي شغله ثانيه الرزق اييك من رب العالمين مو من الناس الله يوفقكم

اختلاف الاذواق لا يفسد في الود قضيه بل يسوي بلوه

التنويع في التصميم وحده من المشاكل الي تواجه المصمم خيال المصمم يختلف عن خيال الزبون وعدم المام الزبون بمعايير التصميم تخلي المصمم بحيره من امره مثال التصميم مثال الرسم ما يحتاج قيود خل الرسام ينطلق بخياله اييبلك لوحه فنيه متميزه عن غيرها واقع الامر في التصميم الاعلاني يقول مثل المثل لو اختلاف الآراء لبارت السلع اختلطت الامور بعد ما كان المصمم يقدم خدمه صار الحين يقدم سلعه الزبون يطلب تصميم وتقعد تصممله بعدين يتدخل في النهايه بو انحط هذا يمين وانشيل هذا يسار تخترب الصوره ويضيع وقتك ويقولك مو حلو والشغل الي تسويه بـ 3 ايام يوصل معاك براي الزبون لي 20 يوم يعني انقطعت الرزقه ولا يشاور الربع بالدوانيه طايحيله كوت وكل واحد زقارته مطرفها يصير برايه بيكاسو ولا ليوناردو لا الاعلان مو جذي يسوونه حط هذاك وييب هذا الزبون شخصيه مو متزنه ماكو راي يقعد يتعبك ومرات ياخذ التصميم ومرات يقولك لا يبه مو هذا اللي ابيه شلون الي تبيه يا معود ذكرني بمثل قاله الدكتور صلاح الراشد بوحده من محاضرات برمجة اللغه العصبيه NLP يقولل دكتورنا تخيل الظهر تمشي بسيارتك الدنيا حر لواهيب وانت مبطل المكيف مريح تشوف واحد واعليه مسيكين طاقته الشمس توقف وتقول تفضل اوصلك يقولك مشكور ويصعد السياره وانت بالطريج تقوله الحبيب وين تبيني اوصلك يقولك ما ادري يا ساتر صج يا ساتر شالبلوه الي طحت فيها وين تبي يقولك مادري المهم هذا الكلام من حر قلبي بس مو هذا موضوع التصميم الاعلاني تصميمنا اليوم حق بنت طلبت مني شعار ما ادري شنو نشاطها التجاري واسمها نوف كل الي قالتلي انه يتعلق بالازياء والاكسسوارات وهذي 3 نماين بنوتتنا اختارت الاخير وانا اخترت الاول حبيت البنت الي رسمتها قلبي كبير شسوي بعد وردينا على اختلاف الآراء واشوف رايكم يا حلوين الشعار اعتمد وانتهى الاختيار بس هم يهمني ذوقكم

وبعد نجاح تصميم الاعلان الأول

نجاح ساحق ما توقعته ردت فعل فرحتني لاول منتج

استخدمت في التصميم الاول نظرية الفن ثيوري نظريه تسويقيه تقول التسويق كسب قلوب ناس بالوناسه تقريب شرحها بالعامي يعني اذا قدرت تخلي شخص يفرح راح تلقى من عنده ردت فعل لموضوعك المنتج الثاني من سلسلة المعابيج الكويتيه معبوج آي وفيها تكمله لقصة حجي عباس وحجي مرزوق القصه طويله وكاتبها في اماكن مختلفه الي حاب يقراها يدش على القوقل ويكتب معبوج احح وراح يوصل للقصتين ملوت المنتج

تصميم اعلان معبوج كويتي وبدأ التجاره الالكترونيه

منتج كويتي مشهور ما يخلى البيت منه على سفرت الغدا الحجيه مسويتلي مطبق زبيدي والوالد يومها ما ادري شفيه علي كل لقمه حاطلي لغم غاشني بعد الغدا قعدت اطالع المعبوج فكرت وصارت سويت هذا التصميم وانتجت كمية 100 حبه طبعت الستيكر وظبطت شغلي نزلت الاعلان ونشرته على كل المواقع ما اكتفيت بالتصميم بس الاشهار واسلوب الدعايه فن ما راح اطول عليكم اخليكم مع القصه

قصة المعبوج

طويله ما عليك الا انك تطلع على القوقل وتكتب معبوج اح تلقى القصه بمليون موقع

تصاميم وانفردت تصميم اعلان تصميم بوستر

تصميمي لبوستر الزقاره الالكترونيه عبدالله السرهيد يعرفني على فهد الحمدان ونعم الرجال فهد رجل تجاره يتميز بالمنتجات الغريبه واليديده يطلب مني تصميم بوستر للزقاره الالكترونيه احدى منتجات شركة ديسونيك اتفقت معاه اني اصممله 3 بوسترات وشائت الصدف بعرض اول بوستر يعجب حجي فهد المعنى من هذا البوستر واضح الجزء الي فيه الزقاره الالكترونيه يبين من التصميم صحة الانسان والجزء الي فيه كلمة التدخين يبين تلف صحة الانسان انفراد المعنى وانشاء الله تعجبكم هالصوره

شاورما شك تصميم اعلان وتسويق للسرهيد

عبدالله السرهيد شاب كويتي طموح تميز بعصاميته ويصير اول معلم شاورما بالكويت شفت اعلان الرجل في احد المواقع شاب كويتي معلم شاورما قلت لا ما ينفع جذي هذا ولد ديرتي للاسف بعض العادات والتقاليد تحارب الشاب الطموح بمعنى معظم كلام الشارع كويتي وتشتغل معلم شاورما ليش الحكومه مقصره الحكومه ما عليها قصور والخير بديرتنا موجود وحلاته الخير لاهله دهنا في مكبتنا من شفت اعلان الولد قلت لازم اسويله تصميم تجاري يساعده يكمل شغله وهذا تشجيعي حق السرهيد كفو عليك يا السرهيد للاعلى انشاء الله بعد هذا الاعلان كسبت رجل وكسب الرجال افضل من كسب المال

الاعلان التجاري المعروض يحتوي على اللوقو الشعار واللوقو المعروض يبين النشاط التجاري الشاورما اخترت اسم شاورما شك من اللهجه التركيه اصل الشاورما اللون الاحمر دلاله على لون اللحم ولحم السرهيد فرش وتتبيلته عجيبه طلبوا من عنده حق عزايمكم وافراحكم

تصميم شعار لوقو موقع مجمع الكويت الالكتروني

الفتره الاخيره شهد الانترنت انتشار مواقع البيع والشرا في الكويت بعد ما كان مقتصر بموقع واحد كويتي الاكثر شهره مزاد الكويت الى ان وصلنا الى 12 موقع وبالاصح منتدى لانه المنتديات منتشره بسرعه كل موقع يتنافس مع الموقع الثاني ويتميز عن الموقع الثاني بخدماته الشباب اصحاب المواقع ابتدوا يتصلون فيني للتنافس في ما بناتهم الي يضيفني على المسنجر والي يكلمني بالتلفون والي يقابلني مقابله شخصيه من الشخصيات المتميزه براك القطان صاحب موقع http://www.q8netmall.com/ موقع متخصص في البيع والشراء وراح ينطلق بفعاليه اثناء حملته التسويقيه افكار تجاريه يديده تسويق مختلف نوعا ما عن المنافسين اسم الموقع بالعربي كويت نت مول الموقع انشاء الله ينشهر بالجهود الجباره المقدمه فيه هذا الشعار مثل ما شايفين من تصميمي يعبر عن الارتباط التسويقي بين الافراد واصحاب الهوم بزنس شخصين مرتبطين باختصار الكويت نت مول (مجمع الكويت الالكتروني الالوان دلاله على تصميم الموقع زورا موقع كويت نت مول براك القطان يستاهل كل خير وللاعلى انشاء الله

قررت اشتري قاري واطير كرشتي

عبدالله الموسوي صديق صدفه خير من ألف ميعاد كنا قاعدين في ستار بكس الشعب البحري نسولف عن التسويق الالكتروني واعلمه على تخطيطي للدوره المستقبليه في e-commerce

عبدالله اختصاصي تسويق في أحدى الشركات الكبيره وضع النقاط على الحروف بشهادته انه التسويق الالكتروني مهم والكويت اليوم
ترى نقله نوعيه في عالم الإنترنت استمعت له وسمع لي الجو كان مو طبيعي خيال تقول قاعدين بزلمسي ادري تقولون قويه مع القهوه وانغام الجاز ومغازل الشباب الي يمنا اقول حق عبدالله صكني اليوع قهوتهم ما غثتني نطلع لمكدونالدز الشبع واندبه كوارتر باوندر وختام القعده الحلوه يشجعني يقولي انا مسوي رجيم وخسبقت السالفه روح اشترلك قاري ونتمشى يميع على البحر مع الطراريد سنيار من فير الله

قعدت فكرت شوي قبل لا اجاوب طالعت الكرشه مخربه ديكور الملابس وقررت اشتري قاري مع العبد وارد امجاد الطفوله اكثر واحد يويل بالقاري ويزفونه سيايير الفريج كله طالع بويهم من لفه لي لفه ومن سجه لي سجه ادعولي اطير كرشتي

حنانه قطوتكم بعد معصبه

استضافتني من منتدى سيده فجر الكويت ويومها مالي خلق تعبان ومتكسر صممتلها هذا الشعار بعد ما نشفت ريجي باسالتها وين بتسوي الدعايه حق شنو ليش شمعنى فهمني طالع يمين طالع يسار اخذ فوق تحت يبووووووووووي بيني وبين نفسي اقول منو هذي ذكرتني بالحجيه لين كنت اروح وياها السوق واحنا صغار تقول حق صاحب المحل جم يقولها بالسعر الفلاني ترد تقوله جم ينزل شوي لين تجكه بعدين اتخليه بروحه بعد ما شربت قهوتي وعدلت المخ والمزاج سالت تلك السيده جم عمرج المفاجأه العمر 19 سنه كانت بصراحه مفاجأه بالنسبه لي تدرون ليش ما توقعت بنت بهذا العمر يكون لها هذي العقليه التجاريه عقليه جباره لها مستقبل جميل بنت عمليه فكر منظوم ومرتب قلتلها بنزل مقاله عن قصة الشعار وبخلي عنوانها فجر الكويت الحنانه ردت علي حنانه قطوتكم هههههههههه هذي قصة العنوان قصة الشعار الالكتروني التجاري للبنت اسم الحركه فجر الكويت المرأه الكويتيه بطبيعتها حنونه فالقلب اجمل شعار للحب والحنان وسط القلب شروق الشمس استدلال للفجر والالوان الوان علم ديرتنا الكويت الحبيبه تستاهل فجر الكويت وللاعلى انشاء الله

شعار أم علي

يوميا ادخل على المنتديات والمواقع بشغف ونشاط ادور عن اخر طرق التجاره الالكترونيه والاشهار ومنزل اعلانات لي في مواقع وايد بين انا في المواقع وحوست الاميلات وحوست المنديات وصلتني استضافه على اميلي ودار حوار بيني وبين المستضيف (وبالأحرى المستضيفه أم علي )
أم علي امرأه كويتيه طموحه مقدره اهمية التجاره الالكترونيه والاعلانات على النت وهذا الي فهمته من كلامها الراقي امرأه مثقفه مجتهده محترفه المشغولات اليدويه ومصممه ازياء لها محل شرته ودفعت فيه باسواق القرين ومتوهقه مثل باجي الكويتيين الحين في مسألة القضيه المرفوعه ضد السوق انه موقع مهني مو موقع تجاري مساكين هالعالم وين يروحون بعد ما اجرتوا عليهم وخسرتوهم الحين اتقولون لهم موقع مهني مو تجاري رحت بعيد خل ارجع للحوار ام علي طلبت تصميم لوقو شعار حق محلها ملك الألوان بكل بساطه يا جماعة الخير الشعار دلاله يدل على معنى الشيء بالصوره او الرمز او الكلمات وممكن تكون حرف واحد بس يعطي المعنى كامل فلا تخلون الي ما يفهم طبيعة السوق او البيئه الي عايش فيها وما عنده دراسات يسويلكم الشعار اخليكم مع الصوره واتضح العنوان تمت

محمد طالب في الجامعه الامريكية الله يوفقه ويوفق طلبتنا

ولد خالتي حمود (دلع كلمة محمد بالكويت ) يتصل علي ويطلب مني اصممله شعار للجامعه الأمريكيه الحلو بالجامعات الخاصه اهتمامهم بالطالب وعلاقاته بالبيئه العمليه كلام كبير
يعني مثقف افا عليكم ليش مو مثقف قاعد ادون قليل من يفهم بالمدونات وقليل من يفهم معنى البيئه العمليه (هذي بيئة التعاون المشتركه بين الطلبه بالجامعه الي راح تنعكس على حياة الطالب المتخرج المؤهل للبيئه العملية في دوامه صممتله شعاره بـ 20 دقيقه وراح الجامعه حق القروب الي مسوينه ويرد يقولي لا خوش شعار بس في جم واحد بالقروب لي الحين ما عطونا رايهم ما ادري شسوي معاهم وانا من داخلي اقول حمود تكفه مقعدني الظهر ومسويلك الشعار مساعدك فيه المتكرر بحياتنا بعد الغداء نشرب لبن وانام وانت يايني تتحلطم ناس اعتمدوه وناس ما اعتمدوه روح يبه اخذ الشعار مافيه شي انا اشوفه احلى شعار لانه حرمني من نومتي استحيت اقوله عن الي قاعد يسولف بقلبي قلتله روح شاورهم وعطني خبر الحمدلله الليل ياني اتصال وقالي بو ناصر اعتمدنا الشعار شغلك خوش

فيديو من انتاجي للتسويق

التسويق الالكتروني حقيقه أم خيال

مواقع وايد فيها كلمات مختصه بالتسويق والدعايه والاعلان وابدي مشواري مع التسويق الالكتروني في المدونات حقيقه ولا خيال سؤال يتوجه لكم اصحاب المدونات اصحاب القرن ال 21 الناس المثقفه المطلعه الباحثه على سرعة الكلمات والصور في بحر الانترنت

بس عليكم تعطوني رد نعم ولا لأ واميلاتكم لو سمحتوا